TECNOLOXÍA – PROXECTO

XERA (Axencia galega da Industria Forestal) organiza, en colaboración coa Escola de Arquitectura de CESUGA, as I Xornadas Internacionais Madeira 2020, co lema TECNOLOXÍA E PROXECTO. As Xornadas levaranse a cabo na sede do CESUGA na Coruña, en tres sesións, correspondentes a tres escalas de aproximación á madeira, durante os días 7 e 8 de Febreiro.

No hall do edificio realizarase unha EXPOSICIÓN de imaxes seleccionadas do traballo en madeira de relatores e docentes de CESUGA.

Céntrase a atención na INNOVACIÓN TECNOLÓXICA e a súa relación co PROXECTO, entendido este como procura racional de solucións intelixentes, coherentes, lóxicas, poñendo en valor cuestións de carácter biolóxico, ecolóxico e antropolóxico, como garantía dun “habitar” máis sustentable. Neste contexto, a MADEIRA perfílase, con claridade, como materia prima vital no camiño cara a un modelo bioeconómico. Búscase un dobre enfoque, teórico e práctico, desde tres escalas vinculadas, TERRITORIO, ARQUITECTURA, MOBLE.

Nunha primeira sesión, sobre a base dun urbanismo ecolóxico, analizaranse e tomaranse en consideración, as posibilidades que ofrece a madeira a escala territorial, a través dunha ordenación, planificación e xestión forestal sustentable. Presentaranse modelos de desenvolvemento sustentable, comprometidos cos valores culturais e ecolóxicos do territorio, buscando o equilibrio entre innovación tecnolóxica e tradición. Interesa, en paralelo, a diagnose do sector forestal en Galicia; especies, estrutura, paisaxe, ferramentas de análises, proxectos de investigación, así como intervencións en zonas de bordo, límite.

A aparición de novos sistemas construtivos, froito do continuo perfeccionamento e invención tecnolóxica, fai necesaria unha revisión dos fundamentos tectónicos, que conduza ao desenvolvemento de estratexias de adaptación intelixentes, que non perdan de vista a naturalidade, sensatez e racionalidade dos sistemas tradicionais. Mostrarase neste sentido, nunha segunda sesión, arquitectura construída en madeira, de gran sensibilidade, coherencia e claridade conceptual. Indúcese á reflexión ao redor da expresión arquitectónica, os criterios formais no uso da madeira en edificación, o estándar passivhaus e a bioconstrución.

En terceira sesión, madeira a pequena escala, o moble, contrastaranse visións e experiencias relacionadas cos procesos de deseño e fabricación actuais, analizando a influencia das novas tecnoloxías, CAD- CAM-Robótica, os procesos de produción en serie, e o diálogo entre innovación industrial e artesanía.